Kush e ka përjetuar më parë dhimbjen që shkaktojnë gurët në veshka, e di shumë mirë që është një nga dhimbjet më të forta që njeriu mund të provoi në jetë. Niveli i dhimbjes karahasohet madje me atë që ndiejnë gratë gjatë lindjes.
Por nga çfarë shkaktohet kjo dhimbje? Si formohen gurët në veshka dhe si mund ti evitojmë ato?
Lajmi i mirë është se gurët mund të parandalohen dhe mund të trajtohen me mënyra tepër efektive dhe natyrale.
Çfarë janë gurët në veshka?
Dehidratimi, konsumimi i disa ushqimeve specifike, infeksionet apo arsye të tjera të cilat do ti përmendim më vonë, bëjnë që brenda veshkës të formohen disa masa kristalore, me formë të çrregullt, të cilat njihen me termin ‘gurë në veshka’.
Gurët janë të përbërë nga kripëra dhe minerale si kalcium, oxalate dhe acid urik.
Duke qenë se këto kristale nuk treten dot me urinën, me kalimin e kohës bëhen më të koncentruar dhe marrin formën e gurëve të vegjël. Këto gurë mund të jenë sa një kokërr rëre por mund të zmadhohen dhe sa një top golfi.
Çfarë i shkakton ato?
Ka disa arsye përse krijohen gurët në veshka, dhe kjo varet veçanërisht nga këto faktorë:
- Kur nuk konsumoni mjaftueshëm ujë apo lëngje të tjera. Kur konsumoni ushqime që përmbajnë shumë proteina, por pak fibra.
- Kur konsumoni ushqime me shumë kripe.
- Kur keni një jetë sedentare apo jeni në regjim shtrati.
- Nëse keni pasur infeksione të mëparshme urinare.
- Nëse keni vuajtur më parë nga gurët në veshka, kryesisht përpara moshës 25 vjeç.
Cilat janë shenjat që tregojnë se keni gurë në veshka?
Ju mund të mos e kuptoni që keni gurë në veshka deri në momentin që filloni të ndjeni dhimbje.
Dhimbjet shkaktohen kur guri lëviz brenda veshkës apo kalon në uretër duke bllokuar rrjedhën normale të urinës. Zhvendosja e tyre bën që veshka të fryhet dhe uretra të kontraktohet. Në mjekësi kësaj i referohemi me termin kolikë renale.
Kolika renale karakterizohet nga:
- Dhimbje të forta në anë, prapa dhe poshtë brinjëve.
- Dhimbje që ndihen deri në pjesën e poshtëme të barkut dhe ijëve.
- Intensiteti i dhimbjeve vjen dhe ikën si ‘valë’.
- Dhimbje apo ndjesi djegie gjatë urinimit
Shenja të tjera:
- Urinë me ngjyrë rozë, të kuqe apo kafe
- Urinë e turbullt me erë të fortë
- Nevojë e vazhdueshme për të urinuar, më shumë se zakonisht apo me sasi të vogla
- Të përziera apo të vjella
- Temperaturë dhe të dridhura nga ndonjë infeksion i mundshëm
Në çfarë mënyre mund t’i parandalojmë ato?
Për sa i përket kurimit dhe parandalimit të gurëve në veshka, lëngjet luajnë një rol tepër të rëndësishëm. Rekomandohen rreth 2.5 litra ujë në ditë, së bashku me lëngje të tjera si çaj, kafe dhe lëngje frutash.
Këshilla të tjera po aq të rëndësishme:
- Një tjetër këshillë mjaft funksionale është të pini ujë me limon pasi ndihmon në tretjen e kristaleve.
- Gatuani ushqime me sa më pak kripë ose përdorni erëza të ndryshme.
- Evitoni pijet me shumë gaz dhe limitoni konsumimin e alkolit.
- Kryeni aktivitet fizik në mënyrë konstante.
- Limitoni ushqimet që kanë tepricë natriumi dhe oksalate.
- Mos e teproni me suplemente të tilla si vitaminë C apo D, pasi ato favorizojnë formimin e gurëve.
- Ndjekja e një diete me një sasi të limituar proteinash, është e këshilluar pasi një dietë me tepricë proteinike rrit sasinë e acidit urik. Kjo nuk do të thotë që nuk duhet ta plotësoni dozën e rekomandohet, për një jetë të shëndetshme.
*Kujdes! Është e rëndësishme të mos bëni ndryshime në dietë pa u konsultuar më parë me doktorin apo dietologun tuaj.
Si trajtohen gurët në veshka?
Trajtimi më natyral që rekomandohet nga mjeku, është të konsumoni sa më shumë ujë çdo ditë, derisa guri të dalë jashtë organizmit, përmes urinës.
Në rastet kur guri është tepër i madh për të kaluar në mënyrë natyrale, atëherë hiqet në mënyrë kirurgjikale.
Këto mënyra janë:
Litrotripsi- Valë goditëse për coptimin e gurëve në pjesë më të vogla.
Nefrolitotomia perkutane- Një prerje e vogël në shpinë.
Ureteroskopia- Heqja e gurëve me një kapëse të vogël, që kalon përmes fshikëzës në uretër.
Ndërsa për dhimbje të forta mjeku mund t’ju japë një recetë me medikamente qetësuese ose t’ju injektojë një ilaç anti-inflamator.
Shënim!
Nëse dyshoni se keni gurë në veshka apo konstatoni simptomat e permendura në këtë artikull, Farmanet ju këshillon të kryeni sa më parë një vizitë tek mjeku i familjes ose mjeku specialist.