Shëndeti mendor mund të ketë një formulë ekzakte; Sipas studimit të psikologut Klif Arnall në vitin 2004, studim i cili u përdor më vonë nga kompania e udhëtimeve ‘Sky Travel’ për qëllime promovuese, formula bazohet në disa faktorë kryesorë. Faktorë që kontribuojnë specifikisht për gjëndjen e një humori të ulët.
Në grafikën e mësipërme simbolet përfaqësojnë: W- Moti, D- Borxhet. d- Rroga mujore, T- Koha që nga festat e fundvitit, Q- Koha që nga dështimi i rezolucioneve të vitit të ri, M- Nivele e ulëta të motivimit, Na- Ndjesia e nevojës për shplodhje.
Mesa duket dita më depresive e vitit priret të jetë e hëna e datës 16 janar 2023. Kjo ditë akordon me gjëndje të ulët humori, me shpirta të pezmatuar dhe prirje depresive. Në përgjithësi, priremi të ndihemi keq këtë ditë, pasi moti është i ftohtë dhe plogështues, sapo jemi kthyer në punë nga pushimet, duhet të fillojmë të kompensojmë paratë që shpenzuam gjatë festave dhe ndihemi fajtorë se pse i kemi thyer aq shpejt synimet e Vitit të Ri. .. Nuk ka më keq apo jo?
PYETJA E SHEKULLIT: Si të ndihesh më mirë?
Elementet e përdorura në përllogaritjen e formulës janë faktorë që realisht qëndrojnë për matjen e gjëndjes tonë mendore. Kushtet e motit në janar janë të mjerueshme, njerëzit dorëzohen zakonisht në përmbushjen e synimeve të tyre të reja që në janar. Gjithashtu në këtë periudhë, nivelet e frymëzimit janë të ulëta dhe mund të ketë dhe ndonjë detyrim të fundvitit të cilin nuk e keni shlyer akoma.
Nuk do ndiheni keq nëse kini parasysh se…:
- Të gjithë kemi ditët tona të mira dhe të këqija, rrethanat e gjithsecilit prej nesh janë unike dhe nuk ka sesi të ndihemi të gjithë njësoj.
- Janari mund me të jetë një rast i mirë për të monitoruar mirëqenien tonë emocionale… në vend që t’a konsideroni veten ‘poshtë’ reflektoni mbi prosperitetin tuaj psikologjik dhe vazhdoni t’a bëni këtë gjë gjatë gjithë vitit.
- Mund t’i diskutoni gjërat me të tjerët, pasi kjo është diçka vërtet shumë e vlefshme për mirëqenien tonë psikologjike; Një problem i përbashkët është një problem i përgjysmuar. Pothuajse…
Dhe ju sigurojmë se do ndiheni më mirë nëse zbatoni këto këshilla…:
- Përqendrohuni tek gjërat e dobishme… që po ndodhin në jetën tuaj dhe bëni gjithçka për të mos u “mbytur” nga ato gjërat që nuk po ju shkojnë mirë momentalisht.
- Jini mirënjohës për çdo të mirë që ka ndodhur dhe kjo do t’ju ndihmojë t’a keni më shumë mendjen tek gjërat pozitive rreth jush, pavarësisht sesa pak janë ato. Për shembull, mund të jesh thjesht mirënjohës për shplodhjen e mirë që more mbrëmjen e djeshme, që mbarove një punë që kishe në kohë, apo për drekën e këndshme që kalove me kolegët e punës një ditë para.
- Përpiqu të qeshësh më shumë dhe pa hezitim. Nuk ka nevojë për aprovimin e studimeve për të mësuar se të qeshësh ndihmon në lehtësimin e stresit, depresionit dhe ankthit. Një buzëqeshje spontane dhe e ndier na çon menjëherë shpirtin dhe na motivon t’i shohim gjërat me më shumë optimizëm.
- Përdor pohime pozitive! Nis çdo ditë të re me një ide, thënie, kujtim ose deklaratë pozitive dhe mbaje atë në mendje gjatë gjithë ditës (nëse mundesh).
Edhe diçka e fundit…
Rëndësia e shëndetit mendor po shihet gjithnjë e më me shumë seriozitet ditët e sotme. Ndërkohë që stresi mund të ketë efekte pozitive në aspektin e motivit, nëse nuk kontrollohet siç duhet, ai gjithashtu mund të shfaqet në një sërë mënyrash negative. Termi “stres” ka shumë konotacione të ndryshme. Ai varion nga presioni mendor që ndiejmë për të performuar mirë në punët tona, tek presioni i kohës për të kaluar listën tonë të impenjimeve të përditshme, sikurse rritja e emocioneve që ndiejmë kur vonohemi për një orar takim.
Ekzistojnë disa simptoma të mundshme të sjelljes që mund të shfaqë një person i stresuar, të cilat përfshijnë nervozizëm, mungesë ose shtim të oreksit si edhe çrregullime të gjumit. Ai (stresi) është një fenomen shumë prezent dhe zgjidhja e tij shpesh kërkon një qasje të shumëanshme; Zgjidhje të kombinuara që vijnë nga dietat tona ushqimore, suplementet e stresit, aktiviteti fizik dhe terapitë psikoanalitike.
Gjëja e rëndësishme për t’u theksuar është se pothuajse të gjithë përjetojnë një nivel stresi në jetën e tyre, kështu që kini parasysh se nëse stresi po ndikon negativisht në jetën për momentin, nuk jeni asnjëherë vetëm.